Árið 2019 var viðburðaríkt og lærdómsríkt í fjölbreyttum rekstri OR og dótturfyrirtækjanna. Hér er stiklað á helstu viðburðum.
Árið 2019 var viðburðaríkt og lærdómsríkt í fjölbreyttum rekstri OR og dótturfyrirtækjanna. Hér er stiklað á helstu viðburðum.
Veitur virkja viðbragðsáætlun í rekstri hitaveitunnar vegna kuldakasts. Rennslið um hitaveituæðar Veitna á höfuðborgarsvæðinu nær nýjum hæðum, 16 þúsund tonnum á klukkustund að jafnaði í sólarhring. Það er mesta notkun sem sést hefur. Unnið er samkvæmt viðbragðsáætlunum til 2. febrúar.
Orkuveita Reykjavíkur hefur útgáfu á grænum skuldabréfum til að fjármagna þau fjölmörgu grænu verkefni sem eru á döfinni hjá OR og dótturfyrirtækjunum Veitum og Orku náttúrunnar. Skuldabréfaútgáfan, sem hefur hlotið hina eftirsóttu einkunn að vera dökkgræn, eru síðan tekin til viðskipta á Nasdaq Iceland Sustainable Bond markaðnum.
Stjórn Orku náttúrunnar ræður Berglindi Rán Ólafsdóttur framkvæmdastjóra fyrirtækisins eftir að starfið hafði verið auglýst. Berglind hafði starfað hjá ON frá árinu 2017.
Gagnaveita Reykjavíkur krefur Símann um tæplega 1,3 milljarða króna skaðabætur vegna fjárhagslegs tjóns sem fyrirtækið hefur orðið fyrir sökum brots Símans á fjölmiðlalögum.
Á opnum ársfundi OR skrifa borgarstjóri, forstjóri OR og framkvæmdastjóri Veitna undir samkomulag um stórfellda uppbyggingu innviða í borginni fyrir rafbílaeigendur. Samsvarandi samningar eru gerðir við Akranes og Garðabæ síðar á árinu.
Forseti Íslands tekur formlega í notkun nýjustu og fjölbreyttustu fjölorkustöð landsins. Orka náttúrunnar kemur að stöðinni með tvennum hætti; rekur þar hraðhleðslur og útvegar vetni fyrir vetnisbíla.
Konur í orkumálum gefa út skýrslu um áhrif kvenna innan orku- og veitufyrirtækja á Íslandi. Þau reynast mest innan samstæðu Orkuveitu Reykjavíkur.
30 þúsund laxaseiðum komið fyrir í tveimur sleppitjörnum við Andakílsá. Þetta er liður í endurreisn lífríkis árinnar í kjölfar aurburðar sem varð sumarið 2017 vegna viðhalds og ástandsmats á stíflumannvirkjum Andakílsárvirkjunar.
Tillaga með nafninu „Með orkunni úr ánni er tertan bökuð“ var í dag valin til verðlauna í hugmyndasamkeppni um sögu- og tæknisýningu í Elliðaárdal. Það var Orkuveita Reykjavíkur sem gekkst fyrir samkeppninni í samstarfi við Hönnunarmiðstöð. Fyrirhuguð sýning mun nýta hina tæplega aldargömlu rafstöð í Elliðaárdal auk nærliggjandi húsa.
Að forgöngu stjórnvalda er undirrituð viljayfirlýsing um að stóriðjan á Íslandi kanni til hlítar hvort það sé fýsilegt að binda kolefnisútstreymi hennar í berglögum með CarbFix-aðferðinni sem OR og ON hafa þróað við Hellisheiðarvirkjun.
Rannsókn Orku náttúrunnar á kolefnisfótspori rafbíla við íslenskar aðstæður kemur út. Heildarlosun rafbíls, frá framleiðslu að 220 þúsund km. akstri, er einungis fimmtungur til fjórðungur af heildarlosun bíla sem nota jarðefnaeldsneyti.
Orkuveita Reykjavíkur verður fyrst íslenskra fyrirtækja til að skrá græn skuldabréf á markað Nasdaq Iceland fyrir sjálfbær skuldabréf.
Stjórn Veitna ræður Gest Pétursson framkvæmdastjóra fyrirtækisins að undangenginni auglýsingu. Gestur kemur til Veitna úr forstjórastóli Járnblendiverksmiðjunnar á Grundartanga.
Í tilefni 35 ára afmælis Sniglanna, Bifhjólasamtaka lýðveldisins, er lagt upp í vikuleiðangur allt í kringum Ísland á rafmagnsbifhjólum í samstarfi við ON. Þrátt fyrir rysjótt veður nær hersingin til Reykjavíkur þar sem haldið er málþing um orkuskipti í þessum anga samgangna.
Eftir úrskurð samgöngu- og sveitarstjórnarráðuneytisins í kjölfar kæru, leiðrétta Veitur vatnsgjöld ársins 2016 í þremur af sveitarfélögunum sem fyrirtækið þjónar.
Stefan Löfven, forsætisráðherra Svíþjóðar sótti Hellisheiðarvirkjun Orku náttúrunnar heim í dag með nokkru föruneyti til að kynna sér jarðhitanýtingu hér á landi. Katrín Jakobsdóttir, forsætisráðherra, tekur á móti Stefan ásamt Brynhildi Davíðsdóttur, stjórnarformanni OR, og Bjarna Bjarnasyni forstjóra.
Brynhildur Davíðsdóttir, stjórnarformaður OR, og Bjarni Bjarnason forstjóri taka á móti Angelu Merkel Þýskalandskanslara í Hellisheiðarvirkjun og eiga við hana og ráðgjafa hennar langt spjall um hagnýtingu jarðhita og kolefnisbindingu við Hellisheiðarvirkjun.
Fyrstu heimilin í Árborg, nánar tiltekið á Selfossi, geta tengst Ljósleiðara Gagnaveitu Reykjavíkur. Ljósleiðaratengingar heimila í sveitarfélaginu eru í samræmi við viljayfirlýsingu við sveitarfélagið sem gerð var vorið 2018.
Guðmundur Ingi Guðbrandsson umhverfisráðherra tekur Matarsporið formlega í notkun. Matarsporið er kolefnisreiknir fyrir mötuneyti og og matsölustaði þróaður í af Verkfræðistofunni Eflu í samstarfi við Orkuveitu Reykjavíkur til að reikna kolefnisspor máltíða.
Algaennovation Iceland opnar formlega smáþörungaverksmiðju í Jarðhitagarðinum við Hellisheiðarvirkjun Orku náttúrunnar að viðstöddum fjármála- og efnahagsráðherra. Þetta er fyrsta fyrirtækið sem hefur starfsemi í Jarðhitagarði ON í Ölfusi.
Grunur kviknar um E. coli mengun í neysluvatni frá vatnsbóli Veitna í Grábrókarhrauni og fólki ráðlagt að sjóða neysluvatn. Vatnsbólið þjónar Borgarnesi, Bifröst og Varmalandi auk fjölda sumarhúsa og nokkurra lögbýla í Borgarfirði. Grunurinn er síðar staðfestur og tilmæli um suðu ekki afturkölluð fyrr en 16. október.
Gagnaveita Reykjavíkur hefur söfnun á upplýsingum um þau heimili sem hafa orðið fyrir barðinu á óleyfilegri aftengingu á ljósleiðaraþræði GR og þannig misst samband við Ljósleiðarann, opið gagnaflutningskerfi fyrirtækisins.
Orkuveita Reykjavíkur og EFLA verkfræðistofa gera öllum aðgengilegan kolefnisreikni á netinu þar sem hvert og eitt getur reiknað kolefnisspor sitt á einfaldan og fljótlegan hátt og þegið ráð um hvernig megi minnka sporið.
Orka náttúrunnar upplýsir að á næstu misserum stefni í að ON setji upp um 40 hleðslur fyrir rafbíla víðsvegar um land, þar af sautján 150kW hraðhleðslur. Þetta varð ljóst eftir að niðurstaða Orkusjóðs um styrkveitingar til uppbyggingar umhverfisvænna innviða lá fyrir.
Orkuveita Reykjavíkur einsetur sér að verða kolefnishlutlaus árið 2030. Þetta er metnaðarfyllra markmið en fyrirtækið hafði áður sett sér. Aukin förgun og hagnýting koltvíoxíðs frá jarðgufuvirkjunum Orku náttúrunnar mun vega þyngst í markmiðið náist.
Orka náttúrunnar ákveður að margfalda kolefnisförgun fyrirtækisins við jarðvarmavirkjanirnar á Hengilssvæðinu. Þetta tengist þeirri ákvörðun Orkuveitu Reykjavíkur, móðurfélags ON, að vera búin að kolefnisjafna alla starfsemi samstæðunnar fyrir árslok 2030. Það er tíu árum fyrr en áður hafði verið ákveðið.
Veitur setja upp búnað til að lýsa hluta þess kalda vatns sem íbúar borgarinnar fá úr vatnsbólunum í Heiðmörk. Með því eru örverur, sem geta borist í vatnsbólin, gerðar óvirkar áður en vatninu er veitt út í dreifikerfið.
Í miklu norðanáhlaupi sem gengur yfir allt land virðist fólk halda sig innandyra og ná sér upplýsingar og afþreyingu á netinu. Gagnaumferð um Ljósleiðara Gagnaveitu Reykjavíkur er fjórðungi meiri en venjulega og hefur aldrei nokkurn tíma verið meiri.
Veitur senda liðsauka norður í land þar sem RARIK og Landsnet vinna hörðum höndum við að koma flutningi og dreifingu rafmagns í samt lag eftir óveður sem geysar þar dögum saman.
Ljósleiðarinn nær nú til allra heimila í þéttbýli Kópavogs, Seltjarnarness, Garðabæjar, Hafnarfjarðar, Mosfellsbæjar og Reykjavíkur. Sveitarstjórar þeirra sex sveitarfélaga sem eru á höfuðborgarsvæðinu taka á móti staðfestingu þess efnis frá Gagnaveitu Reykjavíkur.
Stjórn Orkuveitu Reykjavíkur samþykkir að bjóða út framkvæmdir við endurbyggingu hluta skrifstofuhúsnæðis fyrirtækisins við Bæjarháls í Reykjavík. Húsið mun taka nokkrum útlitsbreytingum.
Alvarleg bilun verður á einni af aðalæðum hitaveitunnar rétt við Valsheimilið að Hlíðarenda og heitavatnslaust verður í nánast allri Vesturborginni. Viðgerð gengur þó vel og heitavatnsleysið varir í um 10 klukkutíma.
Tilkynnt er að á eigendafundi Orkuveitu Reykjavíkur hafi verið staðfest sú ákvörðun stjórnar fyrirtækisins að stofna opinbert hlutafélag um kolefnisbindingaraðferðina CarbFix, sem nýtt hefur verið við Hellisheiðarvirkjun með góðum árangri síðustu ár. Dr. Edda Sif Pind Aradóttir, sem verið hefur verkefnisstjóri CarbFix um árabil, stýrir nýja félaginu.
